«Մանչեսթեր Սիթիի» ղեկավարությունը հայտարարել է, որ հարձակվող Կարլոս Տևեսին սպասվում են լուրջ խնդիրներ, քանի որ արգենտինացին խախտել է պայմանագրային իր պարտականությունները՝ Չեմպիոնների լիգայի` «Բավարիայի» հետ հանդիպմանը (0:2) դուրս չգալով փոխարինման։

«Ակումբը պատրաստ է հայտարարել Տևեսի գործի ուսումնասիրման առաջին արդյունքները, - «Սիթիի» ներկայացուցչի խոսքերն է մեջբերում ակումբի պաշտոնական կայքը։ - Մենք եկել ենք այն եզրակացության, որ Տևեսը պետք է պատասխան տա պայմանագրային պարտականությունները խախտելու համար։ Մենք արդեն տեղեկացրել ենք ֆուտբոլիստին, որ նա պետք է մասնակցի գործընթացին։ Լսումները կանցկացվեն ամենամոտ ժամանակում»։

Հիշեցնենք, որ այդ արարքից հետո և մինչ օրս Տևեսը չի մասնակցում «Սիթիի» պաշտոնական հանդիպումներին։ Նրա 32 համարը փոխանցվել է «Սիթիի» պահեստային դարպասապահ Կստել Պանտիլիմոնին։ Ակումբի գլխավոր մարզիչ Ռոբերտո Մանչինին պաշտոնապես հայտարարել է, որ այլևս հույս չի դնում Տևես ազգանունով ֆուտբոլիստի վրա։