"Լիվերպուլի" պաշտպան Մարտին Շկրտելը իր հավաքականից վերադարձել է վնասվածքով: Հիվանդանոցում նա միացել է թիմի ավագ Սթիվեն Ջերարդին, Ջոնջո Շելվիին և Էնդի Քերոլին:
26-ամյա ՇկրտելըՍլովակիայի հավաքական էր մեկնել ազդրի վնասվածքով, ինչի պատճառով էլ չի կարողացել մասնակցել Լյուքսեմբերուգի հետ ընկերական խաղին: Պաշտպանի ապաքինման ժամկետը դեռ հայտնի չէ:
Շարունակում են առողջանալ նաև Ջերարդն ու Քերոլը: Սթիվենը որոշակի հնարավորություններ ունի մասնակցել "Ուիգանի" դեմ շաբաթօրյա խաղին: Իսկ ահա Էնդիի վերականգնման ժամկետը նշելն ավելի դժվար է:
"Հուսով ենք, որ Ջերարդը պատրաստ կլինի շաբաթ օրը: Քերոլն արագ ապաքինվեց: Մենք ոչ մի անգամ չենք նշել նրա վերադարձի ժամկետը և չենք նշի, կարելի է միայն ասել, որ դա մի քանի շաբաթ կտևի: Առայժմ մենք և Էնդին հանգստություն ենք պահպանում, ամեն ինչ լավ կլինի: Մենք չենք շտապում նրան խաղադաշտ վերադարձնելու հարցում",-ասել է թիմի գլխավոր մարզիչ Քենի Դալգլիշը:
Հիշեցնենք, որ Սլովակիայի հավաքականը Հայաստանի ընտրանու մրցակիցն է Եվրո-2012-ի ընտրական փուլում:
