Իռլանդիայի հավաքականի ավագ Ռոբի Քինը հայտարարել է, որ առայժմ չի պատրաստվում ավարտել միջազգային կարիերան:
Այսօր Մակեդոնայի ընտրանու դեմ խաղում 30-ամյա հարձակվողը 105-րդ անգամ դուրս կգա ազգային հավաքականի մարզաշապիկով և 40-րդ անգամ ավագի թևկապը կհագնի' կրկնելով Էնդի Թաունսենդի ռեկորդը:
Ռոբի Քինը սակայն անկեղծորեն խոստովանել է, որ վնասվածքի պատճառով բաց թողնելով վերջին վեց շաբաթները և «Վեսթ Հեմի» կազմում 20 րոպե անցկացնելով, վստահ չէ, թե որքան երկար կկարողանա խաղադաշտում մնալ: Նա նաև մեկնաբանել է նախկինում իր ասածները:
Նա ասել էր, որ ուրախությամբ մի կողմ կքաշվի, եթե իր տեղն ավելի երիտասարդ և առողջ հարձակվող հայտնվի: Շատերը դա համարել էին միջազգային կարիերան ավարտելու մասին ակնարկ:
«Եկեք միանգամից ամեն ինչ պարզաբանենք, ես մտադիր չեմ ավարտել ելույթներս ազգային հավաքականում: Ես ցանկանում եմ խաղալ այնքան ժամանակ, որքան կարող եմ: Կարծում եմ' այսքան տարիների ընթացքում դուք տեսաք, թե որքան նվիրված եմ ես հավաքականին»:
Ռոբի Քինը հիշել է նաև այն օրերը, երբ ինքը նոր էր սկսել ելույթ ունենալ Իռլանդիայի հավաքականի կազմում, ինչպես էին ավելի փորձառու խաղացողներն օգնում իրեն: Այդ առումով նա կարծում է, որ Իռլանդիայի հավաքականը հիմա ավելի հասուն և փորձառու է:
«Երբ ես հավաքականում հայտնվեցի, այնպիսի մարդիկ, ինչպիսիք Նայալ Քուինն ու Թոնի Կասկաինին են, ինձ ֆանտաստիկ աջակցություն ցուցաբերեցի: Երբ երիտասարդ ես, անհասկանալի կերպով նյարդայնանում ես: Քեզնից էներգիա է հորդում, ցանկանում ես ամեն տեղ լինել, և երբ կողքիդ Քուինի նման մեկն է հայտնվում, դա շատ է օգնում»:
«Այսօր մենք երեք նորեկ ունենք' Վեսթվուդը, Ֆոուլին և Օ'Դին: Բայց նրանք բավական ժամանակ են անցկացրել ֆուտբոլում, այնպես որ բավականաչափ միջազգային փորձ ունեն»:
