Հայաստանի հավաքականի հարձակվող Էդգար Մանուչարյանն այսօր ուղևորվելու է Սոչի, որտեղ կմիանա ուսումնամարզական հավաք անցկացնող «Փյունիկին»։ Այս մասին ArmSport.am-ին հայտնեցին «Փյունիկի» մամուլի քարտուղարությունից։ «Փյունիկը» Սոչի ուղևորվեց հունվարի 20-ին, սակայն Մանուչարյանը չմեկնեց, քանի որ պատրաստվում էր պայմանագիր կնքել Լվովի «Կարպատների» հետ։ Էդգարը Ուկրաինա պետք է մեկներ հունվարի 21-ին, սակայն ի հայտ եկան նոր հարցեր, որոնք երկարաձգեցին պայմանագրի ստորագրումը։
Վաղը «Փյունիկը» ստուգողական հանդիպում է անցկացնելու Կուրսկի «Ավանգարդի» հետ, և սպասվում է, որ այս հանդիպմանը կմասնակցի նաև Մանուչարյանը։ Ավելացնենք, որ Ամստերդամի «Այաքսի» նախկին խաղացողի պայմանագիրը «Փյունիկի» հետ ավարտվել է 2010թ. դեկտեմբերին։ Չի բացառվում, որ Սոչիից վերադառնալուց հետո Մանուչարյանն այնուամենայնիվ տեղափոխվի արտասահման։ Առայժմ նա «Փյունիկի» հետ նոր պայմանագիր չի կնքել։
Հիշեցնենք, որ Լվովի «Կարպատներն» արդեն Իսպանիայում է, որտեղ հավաք է անցկացնում 26 ֆուտբոլիստների մասնակցությամբ։ Պետք է նշել, որ Ուկրաինայում տրանսֆերային պատուհանը բաց է մինչև մարտի 2-ը։
|