Իսպանական «Բարսելոնայի» պաշտպան Էրիկ Աբիդալը մասնակցել է Եվրո-2012-ի ընտրական փուլի` Ֆրանսիայի և Բոսնիայի հավաքականների միջև հանդիպմանը: Ֆուտբոլիստը խաղացել է 90 րոպե, սակայն հանդիպումից հետո խոստովանել է, որ ֆիզիկապես լավ վիճակում չի գտնվում, հայտնում է Marca-ն։

Աբիդալը ազդրի վնասվածք ուներ, և նրա մասնակցությունը այդ հանդիպմանը հարցականի տակ էր։ Այնուամենայնիվ, նա  որոշել էր դաշտ դուրս գալ և օգնել իր թիմին։

«Ես նախընտրում եմ չասել Պեպ Գվարդիոլային այն մասին, թե ինչպես եմ ինձ զգում ֆիզիկապես։ Վախենում եմ, որ նրան դա այդքան էլ դուր չի գա։ Բոսնիացիների հետ հանդիպումը շատ բարդ էր։ Տվյալ պահին ես ինձ այդքան էլ վատ չեմ զգում, սակայն ցավեր ունեմ», - ասել է Աբիդալը։